كيف الشركة تشتغل وأنا مو موجود؟
الاختبار الحقيقي لأي شركة: صاحبها ياخذ إجازة 4 أسابيع بدون جوال، ويرجع يلقاها أحسن من ما تركها.
القصة
أغلب أصحاب المشاريع يشتغلوا في شركتهم، مو على شركتهم. وأنا كنت واحد منهم.
في بداية سيلف كنت أسوي كل شي: أؤسس الفكرة، أتعامل مع العملاء، وأتابع كل تفصيلة. وكنت أعتقد إن الحل لما يزيد الشغل هو موظف براتب عالي. موظف شاطر، والمشكلة تنحل.
ما انحلت. الموظف يجي وما يسوي اللي في بالي. مو لأنه مو كفء. لأنه ما عنده إيش يسوي بالضبط.
الفكرة
الشركة ما تمشي بدونك بالناس الشاطرين بس. تمشي لما كل مهمة لها خطوات وحدة، ثابتة، أي شخص يقدر يمشي عليها.
الموظف ما يشتغل بالراتب، يشتغل بالوضوح. الشاطر بدون نظام يسأل، بعدين يجتهد، بعدين يسوي بطريقته، وأنت تعيد كل شي.
مثال من الواقع
أكبر سلسلة مطاعم في العالم نظامها مكتوب لدرجة إن شاب عمره 18 سنة يطلّع لك نفس النتيجة في أي فرع. مو لأنه عبقري. لأن النظام عبقري.
وما أحد يبني مصنع على خطوات تتغير كل يوم. لو كتابة الخطوات فيها عشوائية، معناته ما في نظام لسا.
كيف تطبقها
- سوِّ كل شي بنفسك أول. اجمع بيانات وجرّب، لين توصل للطريقة اللي تشتغل فعلًا. لا تكتب نظام لشي ما أثبت نفسه.
- لما الطريقة تثبت، اكتب كل خطوة تسويها، وحدة وحدة. هذا اللي يسموه SOP.
- حط لكل مهمة شخص، وتأكد إنه درسها وكفء فيها. نفس الشخص ممكن يمسك أكثر من مهمة، بس كل مهمة لازم تكون مكتوبة.
- حط بعده شخص يراجع الجودة. كذا الغلط ينمسك قبل ما يوصل للعميل.
- سلّم القرار مع المهمة. راجع في أول فترة، وبعدين خلّي الشخص يتحمل تبعات قراره.
إيش تستفيد
تطلع من الشغل اليومي، وتسوي الأشياء اللي ما أحد غيرك يقدر يسويها. وتعرف بالضبط لفين تقدر توصل لو زاد الشغل.
والشركة تصير لها قيمة بذاتها، مو بوجودك.
الخلاصة
أهم عامل هو الوقت. تحتاج وقت طويل لين تطمن إن الشغل يمشي بدونك. بس الوقت هذا هو أغلى استثمار تحطه في شركتك.
لو أخذت 4 أسابيع إجازة بكرة، إيش يصير لشركتك؟
للي يبغى يتعمق: The E-Myth Revisited — Michael Gerber